Дзе ж тыя чытачы?..

Аптымізацыя ўстаноў культуры — працэс неабходны. Гэта пацвердзіла і дэпутат Палаты прадстаўнікоў Нацыянальнага сходу Рэспублікі Беларусь Ала Сопікава на сустрэчы з работнікамі культуры раёна. Добра, калі ёсць у вёсцы бібліятэка ці клуб. Але няма сэнсу трымаць бібліятэку або клуб на сяле, калі яны пустуюць. Бюджэтныя грошы лепш накіраваць на сацыяльна-значныя праекты.

Нядаўна ў сродках масавай інфармацыі мусіравалася праблема закрыцця Чамяроўскай бібліятэкі.

Вядома ж добра, што людзей у наш няпросты час цягне да культуры: да кніжкі, газеты. Але ці ёсць на самай справе праблема ў дадзенай сітуацыі? Тым больш што наўрад ці аптымізацыя спыніцца на Чамяроўскай бібліятэцы. Жыццё дыктуе свае ўмовы. Дарэчы, у зоне абслугоўвання Чамяроўскай сельскай бібліятэкі пражывае 376 жыхароў, кніжны фонд яе налічвае больш за 11 тысяч экземпляраў кніг, часопісаў, газет. Сельская бібліятэка знаходзіцца ў трох кіламетрах ад гарадской бібліятэкі № 2, размешчанай на вуліцы Брэсцкая, 69/1 нашага горада, фонд якой складае больш за 37 тысяч экземпляраў, і карыстацца паслугамі гэтай бібліятэкі можа кожны жадаючы. Дзеці, якія пражываюць у вёсцы Чамяры, вучацца ў гарадскіх установах адукацыі, дзе ёсць школьныя бібліятэкі.

Згодна з пастановай Савета Міністраў Рэпублікі Беларусь ад 30 мая 2003 г. № 727 “Аб мерах па ўкараненню сістэмы дзяржаўных сацыяльных стандартаў па абслугоўванню насельніцтва рэспублікі” наяўнасць не менш адной бібліятэкі прадугледжваецца толькі ў аграгарадках.

У сувязі са скарачэннем колькасці сельскага насельніцтва, а таксама ў мэтах аптымізацыі сеткі ўстаноў культуры Слонімскім раённым выканаўчым камітэтам прынята рашэнне ад 23 верасня 2013 г. аб закрыцці Чамяроўскай сельскай бібліятэкі з 1 снежня 2013 г.

Каб патлумачыць людзям сітуацыю, на сустрэчу з жыхарамі вёскі Чамяры прыязджалі прадстаўнікі раённага выканаўчага камітэта.

Работнікам бібліятэкі прапанавалі новую работу. Вядома ж без кніг чамяроўцы не застануцца. У вёску будзе рэгулярна прыязджаць бібліятэка на колах — бібліобус, у якім можна заказаць любую кніжку. Толькі дзіўны ўскрыўся факт: па справаздачах бібліятэкі ў яе было тры сотні чытачоў, а вось у перасоўную біблітэку запісалася ажно… 18… Такія вось рэаліі.

Васіль АФАНАСІК.

One Response к заметке “Дзе ж тыя чытачы?..”

  1. иван
    02.12.2013 at 19:14 #

    Шаноўны аўтар — хітраван. Закрыццё бібліятэк — гэта аптымізацыя ўстаноў культуры? Скажыце шчыра, што дагаспадарыліся «да ручкі», што ў краіне няма грошай, і людзі зразумеюць. А тое, што Сопікава стаіць у гэтай справе на баку выканкама каго можа здзівіць, трэба ж спадарыні адпрацоўваць сваё «абранне» на пасаду.
    Пры такім падыходзе да устаноў культры ў аграгарадках установы,магчыма, застануцца, а вось культура пэўна згіне канчаткова.

Поделитесь своим мнением

  • "Слонiмскi Веснiк" 2018.
  • При использовании материалов гиперссылка (не закрытая от индексации поисковыми системами) на www.slonves.by - обязательна.