Для шчаслівай старасці

++++IMG_9301

+++IMG_9329

У Партызанаўцы адкрыты дом для самастойнага сумеснага пражывання.

Гэта не дом-інтэрнат, дзе людзі знаходзяцца на дзяржаўным забеспячэнні. Тут, маючы свой пакой у добраўпарадкаваным доме з усімі камунальнымі зручнасцямі і агульнай кухняй, насельнікі жывуць за свой кошт. Проста нямоглым людзям не трэба думаць пра цяпло і ўтульнасць, пра ваду і ежу. Тут усё ёсць, як кажуць, гатовае. Да таго ж сацыяльны работнік забяспечыць прадуктамі, медыкаментамі, вядома, за кошт насельнікаў дома.

Двухпавярховы дом разлічаны на пражыванне васьмі чалавек. Пустуючы асабняк у Партызанаўцы на вуліцы Прырэчная, часткова будаўнікамі, а ў асноўным работнікамі сацыяльнай службы раёна пераўтвораны ва ўтульны дом з аздобай пакояў, з сучаснай мэбляй, якую, дарэчы, выдзеліла міжнароднае дабрачыннае таварыства “Сафія”. На кухні ўвесь неабходны набор, ёсць сучасны тэлевізар, пральная машына, тэлефон.

У мінулую пятніцу адбылося адкрыццё дома. Акрамя работнікаў сацыяльнай службы сюды прыехалі начальнік абласнога камітэта па працы, сацыяльнай абароне і занятасці насельніцтва Анатоль Земнавода, намеснік старшыні райвыканкама Сяргей Юшкевіч. Яны і перарэзалі стужку, сімвалізуючы адкрыццё дома.

Як падкрэсліў Анатоль Земнавода (які, дарэчы, дапамагаў адкрыць гэты сацыяльна-значны аб’ект), падобныя дамы пачалі адкрываць менавіта на Гродзеншчыне, яны ёсць у некалькіх раёнах. Цяпер — і ў Слонімскім. Наогул, на Слонімшчыне, адзначыў А. Зiмнавода, сацыяльным пытанням надаецца многа ўвагі. Гэта падкрэсліла нядаўна ў час рэспубліканскага семінара і міністр сацыяльнай абароны. Адкрыццё дома сумеснага пражывання — лішняе пацвярджэнне таго, што новыя формы работы на Слонімшчыне прыносяць плён.

Насельнікі дома толькі пачынаюць абжываць новае жыллё, але ўжо першыя ўражанні выказалі даволі эмацыянальна:

—   Умовы тут цудоўныя, — гаворыць ветэран вайны Сямён Юльянавіч Семяновіч, які прыехаў сюды з вёскі Піронім.

У адным з пакояў пасяліліся муж з жонкай Валянціна Паўлаўна і Аляксандр Паўлавіч Дуброўскія.

—   Вельмі задаволены, — гаворыць Валянціна Паўлаўна. — Благаславі вас Бог, што падарылі нам такую ўтульнасць і цяпло. Мой муж спачатку не хацеў ехаць са старэнькай вясковай хаты сюды, але калі ўбачыў які тут дом, проста шчаслівы, што мы тут разам.

Насельнікі дома ўсё жыццё працавалі. Так склаўся лёс, што пад старасць засталіся адзінокімі. Сацыяльныя работнікі ім дапамагалі, чым маглі. Але ж няма магчымасці адрамантаваць старэнькія дамы на сучасны лад. Мясцовая ўлада выдзеліла для састарэлых дом сумеснага пражывання. Каб старасць у людзей была шчаслівай.

Васіль АФАНАСІК.

Один комментарий к заметке “Для шчаслівай старасці”

  1. иван
    09.12.2013 at 17:57 #

    Слава Богу! Гэта вельмі добра, трэба гэтую ініцыятыву пашыраць. Наша старшае пакаленне заслугоўвае добрых да сябе адносін і паўнавартарснага жыцця напрыканцы свайго жыццёвага шляху!Хай дабраславіць Гасподзь гэту ініцыятыву, ад каго б яна не зыходзіла!

Поделитесь своим мнением

  • "Слонiмскi Веснiк" 2018.
  • При использовании материалов гиперссылка (не закрытая от индексации поисковыми системами) на www.slonves.by - обязательна.