Струмень яравога ячменю

+++++IMG_8122

У раёне пачынаецца масавае  жніво. Убраны азімы ячмень, заканчваецца ўборка азімага рапсу. Мы пабывалі ў СВК “Васілевічы”. У гэтым годзе ўдалося сабраць па 35 цэнтнераў з гектара азімага ячменю (усяго было 69 гектараў) і з 200 гектараў намалаціць 558 тон рапсу. Хлебаробы спадзяюцца, што ў гэтым  годзе і ўраджай яравых будзе большым, чым у мінулым годзе. Праўда, высокадаходны рапс давядзецца  прадаць у лік пагашэння даўгоў, бо іх у СВК “Васілевічы” многа.
З мая гэтага года старшынёй сельгаскааператыва працуе Сяргей Ярош,  вельмі адкрыты і добразычлівы чалавек, патомны дыпламаваны хлебароб. Родам – з вёскі Вішава. Ён расказаў пра арганізацыю ўборкі, калі мы  прыехалі на поле, што каля вёскі Разанаўшчына.
На палях працуе 4 камбайны, перад  пачаткам уборкі быў праведзены інструктаж, выдадзены вогнетушыцелі і іншыя  патрэбныя рэчы, наладжана мабільная  сувязь паміж усімі ўдзельнікамі жніва, каля ўборачнага ўчастка стаіць вадавозка.
Людзей кормяць у полі 2 разы на дзень –  абедам і вячэрай. У гаспадарцы толькі чатыры камбайны айчыннай вытворчасці.
І нагрузка на іх самая высокая ў раёне –  400 га. Як сведчаць механізатары, тэхніка  нядрэнная, яны нават жартуюць: перафарбуй і будзе той жа “Лексіон”. Варта зазначыць, што поле, на якім  расце збожжа, вельмі чыстае – без пустазелля, што гаворыць пра сумленную  працу. Значыць, прасцей пазбегнуць  страт збожжа.
Знаёмімся з адным экіпажам: старшы  камбайнер Аляксандр Пыцель і яго памочнік Сяргей Ярмаловіч. Аляксандр  ужо не першы год працуе на такой машыне і добра яе ведае. У цэлым, камбайнеры задаволены ўмовамі сваёй  працы. Калі пад’ехалі да іх камбайна ў  кузаў МАЗа пасыпаўся “тлусты” струмень ячменю.
Ёсць у гаспадарцы і праблема – не  хапае аўтатранспарту, бо паралельна са жнівом трэба і кармы падвозіць,  і іншых транспартных праблем хапае.  Выдзелілі шэфы – ДРБУ-191 – дзве машыны, але яны не прыдатныя для перавозкі збожжа.
Жніво набірае абароты. Земляробы  СВК “Васілевічы” не без падстаў спадзяюцца на добры каравай.

Яўгенія МАМАНОВІЧ.

  • "Слонiмскi Веснiк" 2018.
  • При использовании материалов гиперссылка (не закрытая от индексации поисковыми системами) на www.slonves.by - обязательна.