На мінулым тыдні для навучэнцаў 2, 4 і 5 класаў ДУА “Новадзявяткавіцкая сярэдняя школа Слонімскага раёна” была арганізавана экскурсія ў самую старадаўнюю і велічную Сынкавіцкую царкву – крэпасць.
Дзеці пазнаёміліся з гісторыяй з’яўлення царквы. Па адной з легенд Сынкавіцкую царкву заснаваў вялікі князь Вітаўт у падзяку за тое, што мясцовыя жыхары дапамаглі схавацца яму ад пагоні Ягайлы.
Дакладны час будаўніцтва царквы невядомы, але агульныя гатычныя канструкцыі дазволілі даследчыкам лічыць, што храм пабудаваны ў канцы XV – пачатку XVI стагоддзя.
Пры рэстаўрацыі знайшлі надпіс на старажытна — грэчаскай мове: «Не кожнаму духу верце, але выпрабоўвайце яго — ці ад Бога ён.» Гэты надпіс мы ўбачылі і сёння.
Навучэнцы даведаліся, чаму яе называюць “царква – крэпасць”. Сведчаннем таму маўклівыя байніцы ў сценах Божага храма. За яго сценамі прашчуры не толькі маліліся Усявышняму, але пры неабходнасці бараніліся ад ворагаў і перамагалі іх. У 1891 годзе побач з храмам пабудавалі двух’ярусную чатырохгранную званіцу.
Экскурсавод расказала нам, што царква таксама славіцца незвычайным гучаннем званоў, якім няма роўных у Беларусі, і акустыкай. Адной з галоўных каштоўнасцей царквы з’яўляецца ікона Божай Маці «Усецарыца», напісаная яшчэ ў XVII стагоддзі.
Нам пашанцавала сустрэцца з настаяцелем Сынкавіцкай царквы Арсеніям Ананько, за духоўнай парадай да якога едуць з розных куткоў нашай краіны. Царква гэтая прыцягвае незвычайнай энергетыкай — прыйдзеш сюды, і не хочацца выходзіць.
Вучням спадабалася экскурсія, таму што з дапамогай гэтага архітэктурнага помніка яны змаглі апынуцца ў XV – XVI стагоддзях і больш дакладна ўявіць пра жыццё нашых продкаў у тыя далёкія часы.
Навучэнцы прадоўжаць вывучаць прыгожыя мясціны нашай Беларусі і з нецярпеннем будуць чакаць новых падарожжаў.
Тамара Серая, настаўнік пачатковых класаў
ДУА “Новадзявяткавіцкая сярэдняя школа
Слонімскага раёна”